Es schwarzes Chaschtli

Eppadie list ma in erre Ziitigsmääldig eppis von erren „Blackbox“. Dermid ischt es „schwarzes Chaschtli“ old es „schwarzes Truckli“ gmeinds. Eppis Ggheimnisvolls, waa numme wweenig Liit wissen, was drin ischt.

Chrigi, är heisst im wirkliche Lläben anders, hed dem Ätti im Gschäft scho frieij a d Hand miessen. Im Schlachthuus, ir Wurschtchuchi hälffen old im Doorf umha ga Fleisch verträägen. Wen är Binder Karin, enem bekannte Chinschtler, waa gäge ds Tal uehi ggwohnt hed,  ischt ga Fleisch old Wurtschtwaare llifren, su hed ma där meischtens es Triichgäld ggän. „Eppis fir an di niwwen Absetz“ hed Kari albe gseid, wen är Chrigin hed es Zwenzgi old es Fiivzgi ggreckt. O ander Liit hein hie und daa gseid „äs ischt den gad rächt esoo,“ wes e Llifrig hei mmiesse bsalen.

Nummen äben. Wie das halt esoo ischt, hed o Chrigi hie und daa Fleusen im Grind gghäben.

Es tags hed är due niid Gschiiders ggwisst, wan under der Brandegg Escht und Ghämpfellig uf ds Gleis und uf Zahschtange vor Rothoorebbahn z legen. D Rothoorebbahn hed ne wwäge „vorsätzlicher Behinderung des Eisenbahnverkehrs“ verchlagt.

Und esoo hed är due bim Jugendawwaalt voor miessen. Allwäg ischt das z Briens chuumm voorchon. Es par elter Bueben hei si emel bir Ggaraasch Mattmüller (z Brienzs seid ma Mattmiller), dert waa etz Streich Buww und Huushaalt gschäfted, vooruusi uf der Terasse versammled. Si hei Chrigin den Uuftraag ggän, är miessi nen den haargenau rapportieren, wie das zue und har ggange siigi.

Chrigis Ätti hed ma ereffned, a ds Biliee und an en allfälligi Bbuess gäbi är ma den nid e Santiin. Das gääiji den alls zu laschte Triichgäld.

Am Tag vom Termiin bim Jugendawwaalt ischt Chrigi due elleinig zwäg. Mi hed nen in es groosses Bbiiroo gfierd. Dert ischt, hinder enem groosse Pult us Massivholz, der Jugenawwaalt gsässen. Där hed ma due braav d Leviite ggläsen. Es Bitzli Indruck hed ma das schoo gmacht. Aber är hed si das schlimmer voorgschtelld gghäben und ischt o mid siinen Gedanken nid ganz bir Sach gsiin. Är hed geng umhi uehi a dWand hindrem Awwaalt miessen achten. Dert ischt näb em Tirgreis es schwarzes Chaschtli gghanged. Chrigi hätti vil derfir ggän, fir z wissen, was daa drin ischt.

Am Schlus vor Verhandlig, Chrigi ischt mit enem scharfe Verwiis und Verfahrescheschte von em Fiivliiber dervo chon,  hed nen der Jugenawwaalt gfräägt, ob är in därren Agglägendheit no e Fraag heigi.

Chrigi hed ne gfräägt: „Fir was ischt das schwarza Chaschtli, waa dert uehi näb der Tiren hanged?“  

Är ischt due meh gleitig voor der Tir vom Bbiiroo gschtanden, fir nid z sägen, der Awwaalt heig nen uusiggruumd. Fir was ds  Chaschtli ischt gsiin, weis är destwägen hiit no nid.

Gnitzt hed die Eppisooden allwäg gliich. Chrigi hed emel von dert ewwäg nie meh de Bbahverchehr behindred.

De rrichtigen Name vo Chrigin lää mmer etz o im schwarze Chaschtli.

Ulrich Stähli-Fardel

Dokument 1: Der Beschluss

Dokument 2: Die Begründung